मानपुर -दाङ)- , मंसिर १६ - सशस्त्र द्वन्द्वका क्रममा आफन्त गुमाएका मध्यपश्चिमका बालबालिकाको शिक्षा र संरक्षणका लागि मानपुर ७ वनकट्टीमा आवासीय विद्यालय स्थापना गरिएको छ ।
हालसम्म जनकल्याण उच्चमावि दुधराशमा पढ्दै आएका बालबालिकालाई भवन निर्माण गरी छुट्टै विद्यालयमा सारिएको हो । क्ष्ाेत्रीय शिक्षा निर्देशनालयबाट सहिद स्मृति आवासीय विद्यालयका नाममा स्वीकृति लिएर कक्षा १ देखि ६ सम्म पठनपाठन गरिएको प्रधानाध्यापक वसन्तराज अधिकारीले बताए ।
बालबालिकाको सम्पूर्ण हेरचाहका साथै नियमित पठनपाठनका लागि आवासीय आठ शिक्षक र तीन कर्मचारी व्यवस्था गरिएको छ । द्वन्द्वमा अभिभावकको मृत्यु, बेपत्ता, घाइते, अपांग भएका बालबालिका पढिरहेका छन् ।
यहाँ ६ कक्षासम्म १ सय ७५ र ७ देखि १० सम्म ७१ विद्यार्थी छन् । '६ कक्षासम्मकालाई छुट्टै विद्यालयमा राखिएको छ, जहाँ अन्य बालबालिका पढ्न पाउँदैनन्,' उनले भने, '७ देखि १० कक्ष्ाा पढ्नेलाई दुधराशमा छात्रावास बनाएर राखेका छौं । उनीहरू जनकल्याण माविमा पढिरहेका छन् ।' प्रतिष्ठानले माओवादी सभासद्का साथै अन्य सरकारी तथा गैरसरकारी निकायबाट सहयोग संकलन गरी विद्यालय खर्च व्यवस्था गरेको अधिकारीले बताए ।
सरकारले प्रतिविद्यार्थी मासिक १ हजार ५ सयका दरले सहयोग गर्दै आएपनि खानबस्न, मनोरञ्जन र खेलकुदका लागि उक्त रकम पर्याप्त नभएको विद्यालयले जनाएको छ । 'जाडो समय छ, पर्याप्त कपडा किन्न सकिएको छैन,' उनले भने, 'आर्थिक समस्या छ । शिक्षक, कर्मचारीलाई तलब खुवाउनुपर्यो । द्वन्द्वपीडित बालबालिकालाई संरक्षण गर्न सबैले चासो दिएमा सजिलो हुने थियो ।'
प्रकाशित मिति: २०६७ मंसिर १६ ०८:४५
